ശകുനി അയച്ച ചാരൻ അയാളുടെ ജോലി കൃത്യമായി ചെയ്തു. ദുര്യോധനെ രാജാവാക്കിയാൽ ജനങ്ങൾ രാജാവിനെതിരെ തിരിയും എന്നും, എല്ലാവർക്കും യുധിഷ്ഠിരനെ യുവരാജാവാക്കുന്നതാണ് ഇഷ്ടം എന്നും അറിയിച്ചു. ഇത് മനസ്സിലാക്കി യുധിഷ്ഠിരനെ യുവരാജാവാക്കാൻ മനസ്സില്ലാ മനസ്സോടെയാണെങ്കിലും ധൃതരാഷ്ട്രർ തീരുമാനിച്ചു. ശകുനി ഈ വിവരം ദുര്യോധനനെ അറിയിക്കുകയും നീ നിന്റെ അധികാരം നേരിട്ട് ചോദിച്ചു വാങ്ങണം. തന്നില്ലെങ്കിൽ പിടിച്ചു എടുക്കണം എന്ന് ഉപദേശിക്കുകയും ചെയ്തു.
ദുര്യോധനൻ നേരിട്ട് അധികാരം ചോദിച്ചു ധൃതരാഷ്ട്രരുടെയും ഗാന്ധാരിയുടെയും മുന്നിൽ എത്തി.
ദുര്യോധനൻ: അച്ഛൻ അന്ധനാണ് സമ്മതിച്ചു പക്ഷെ ഞാൻ അന്ധനല്ലല്ലോ. ഞാനാണ് കുരുവംശത്തിലെ ഏറ്റവും മൂത്ത പുത്രനായ ധൃതരാഷ്ട്രരുടെ മൂത്ത പുത്രൻ. പിന്നെ എങ്ങനെയാണ് അച്ഛന്റെ അനുജനായ പാണ്ടുവിന്റെ പുത്രൻ യുധിഷ്ഠിരനെ രാജാവാക്കുന്നത് ?
സത്യത്തിൽ ജനങ്ങളുടെ പ്രതീക്ഷ തകർത്താൽ ഉണ്ടാകുന്ന ഭവിഷ്യത്തുകൾ ഓർത്തു മാത്രമാണ് ധൃതരാഷ്ട്രർ യുധിഷ്ഠിരനെ യുവരാജാവാക്കാൻ തീരുമാനിച്ചത്. അദ്ധേഹത്തിന്റെ കാഴ്ച്ചപ്പാടിലും ദുര്യോധനന്റെ ചോദ്യം കൃത്യമായ ഒരു ഉത്തരം അർഹിക്കുന്നതാണ്. അതിനു വിധുരർക്ക് എന്ത് മറുപടിയാണ് പറയാനുള്ളത് എന്ന് അദ്ദേഹം സദസ്സിൽ ചോദിച്ചു.
തുടരും…
